Lamháltas lochtanna agus láimhseáil earráidí

Tiomsaíodh Gaois.QueryLogger agus lamháltas lochtanna agus timpeallachtaí ardéilimh/ard-chomhreatha ar intinn againn. Mar chuid den phróiseas logála, cuirtear iarratais i gciú comhreathach i snáithe cúlra ar leith sula maireann na sonraí. Sin cuid den chúis gur beag an taca a chuireann an modh Log() le haga freagartha do fhreastalaí. Is próiseas sioncronach, neasláithreach é seo ach tarlaíonn an próiseas a bhaineann leis na logaí a scríobh sa bhunachar sonraí go haisioncronach i snáithe eile (blas ar leith a bhaineann leis an bpatrún Táirgeora-Tomhaltóra). Úsáideann Gaois.QueryLogger struchtúir sonraí a chuireann an leabharlann System.Threading.Channels ar fáil i dtaca le logáil aisioncronach ardfheidhmíochta.

Ach na logálaithe a chiúáil, caomhnaítear na logálaithe sa chuimhne go dtí go bhféadfaí an próiseas scríofa a atriail má tá ceist seachadta ann faoi I/O an bhunachair sonraí (b’fhéidir go bhfuil go leor tráchta ann nó go bhfuil iarratas costasach ag rith ar an mbunachar sonraí). Is féidir leat uasmhéid an chiú agus an t-eatramh atrialach a shonrú sna socruithe cumraíochta. Má bhaintear uasmhéid an chiú amach, cuileáiltear logálaithe ón gciú ar bhonn 'is túisce isteach is túisce amach.'

Seirbhís foláirimh

Ós rud é go n-úsáidtear ciú an logálaí i snáithe cúlra, ní chuirfear earráidí bunachair sonraí, ná eisceachtaí a bhaineann le scríobh, ar ais chuig an snáithe glaoite. Tá sé tábhachtach, áfach, go bhfuil tú ar an eolas faoi aon fhadhb a bhfuil tionchar aici ar an tseirbhís logála. Chuige sin, faightear seirbhís foláirimh ríomhphoist ar an bpointe boise ó Gaois.QueryLogger. Sonraigh do shonraí ríomhphoist sna socruithe cumraíochta agus cuirfear aon fhadhb in iúl duit. Ach an AlertInterval a shocrú, cinntítear nach bhfaigheann tú ríomhphoist dhúbailte má thagann borradh mór ar chiú an logálaí.